Saridin

Saridin

Sunan Muria duwe murid jenenge Kyai Ageng Keringan, Kiyai Ageng Keringan mung duwe anak siji estri. Kiyai Ageng Keringan lunga rapat ing Masjid Sunan Muria karo Sunan Bonang, Sunan Kalijaga. Sakwise rapate bubar, Kiyai Ageng Keringan banjur bali menyang omah. Satekane ing omah, Garwane ngandut. Nalika Sunan Bonang lan Sunan Kalijaga menyang ing omahe Kiyai Ageng Keringan, Garwane Kiyai Ageng banjur lairan, anake lanang dijenengi Saridin. Saridin duwe mbak jenenge Branjung. Nalika lagi seneng – senenge ngeti bayi sing lagi lair, ora dinyana – nyana ibuke Saridin sing jenenge Sujinah seda.  Amarga Sujinah kuwi seda nalika nglairna bayi, banjur sedane Sujinah dijenengi Seda Kunduran. Banjur Sujinah kuwi namane diganti dadi dewi Samaran.

Singkat critane Saridin wis gedhe, wis diwasa samono uga mbakyune ya wis gedhe. Branjung nikah karo Sariyo. Bojone Branjung mau duweni watak nakal, dheweke tau metengi wong wedok. Dheweke dituntut supaya gelem nikahi wong sing wis digawe meteng mau, nanging Branjung ora gelem dimadu. Banjur Branjung jaluk tulung marang adine supaya gelem ngawini wong wedok sing wis ditengi Bojone mau. Saridin banjur manut lan gelem ngawini wong wedok mau, amarga Saridin kuwi duwe watak nurutan. Saridin banjur nikah karo wong wedok sing ditengi mas ipare, jenenge wong wedok mau yaiku Sarmini. Singkat critane, Sarmini lairan. Nglairna bayi lanang dijenengna Momok.

Amarga Saridin wis ditinggal seda wong tuwane, dheweke lan mbakyune sing ora duwe anak kuwi ditinggali kebun wong tuwane, kebun mau isine tanduran duren. Tanduran duren mau diparo kanggo wong loro, yen durene uwuh lan tiba ing wayah esuk kuwi dadi duwene Mbakyune, yen uwuh wayah wengi duwene Saridin. Ora dinyana – nyana duren sing tiba ing wayah wengi kuwi akih lan wayah esuk mung sitik. Bojone Branjung duweni sifat nakal, dheweke dheweke ora nrima yen duren jatahe Saridn kuwi luwih akih tinimbang duwene. Banjur dheweke duwe niyatan arep jupuk duren sing tiba ing wayah wengi, yaiku duren sing kudune duwene Saridin. Niyate jupuk duren sing tiba ing wayah wengi mau dilakokake karo nyamar dadi macan. Saben duren sing tiba ing wayah wengi mau dijupuk macan kuwi mau, suwe – suwe Saridin ngerti bab kuwi mau sadurunge dheweke curiga yen durene sing tiba ing wayah wengi kok cepet ilange. Dheweke ngawasake macan sing jupuki durene, banjur macan kuwi mau dipateni nganggp pucukan pring. Macan mau mati, lan nyuwara “ waduh “. Krungu suwara kuwi, Saridin bingung macan kok bisa nyuwara kaya wong sing kelaran. Ngerti yen bojone mati, Branjung jerit – jerit, dheweke takok marang adhine sapa sing wis tega mateni bojone. Saridin jawab yen sing mati kuwi dudu bojone mbakne nanging macan, banjur dheweke ngaku sing mateni macan kuwi mau dheweke.

Krungu bab kuwi mau, perangkat desa padha teka. Saben Saridin ditakoki sapa sing mateni bojone Branjung, dheweke ora ngaku, dheweke mung ngomong yen dheweke kuwi mateni macan ora kangane.  Amarga dheweke wis mateni mas ipare, banjur dheweke diukum, ukumane yaiku dheweke digawa neng  tahanan. Nalika neng tahanan dheweke kepengin ketemu karo anak bojone, banjur dheweke kandha marang petugase, petugase mung jawab yen Saridin kena metuki anak bojone, yen dheweke bisa metu dhewe. Banjur dheweke metu saka tahanan kuwi tanpa dibantu petugas. Tangga omah sing ngerti yen Saridin sing kudune ana ing penjara malah metu saka penjara banjur padha nggudak. Saridin lunga menyang Kudus.

Ing Kudus dheweke merguru marang Sunan Kudus. Ing kene dheweke tambah dudohake kehebatane. Nalika dheweke diutus Sunan Kudus supaya maca syahadat, dheweke diremehna santri – santri liya ing kana. Ora mung kuwi wae, dheweke uga digawe kalah – kalahan santri. Nalika ana tugas ngisi bak, dheweke ora diwenehi gayung malah diwenenhi keranjang. Amarga dheweke pinter, mula keranjang kuwi mau kena gawe ngebaki bak. Ngerti ngono mau, santri – santri padha kaget, Sunan Kudus banjur rawuh lan nguji kehebatane Saridin. Sunan Kudus, nakoki Saridin bab kelapa sing digawa. Takokane yaiku “yen banyu kuwi mesthi ana iwake, apa iya banyu klapa ing jero iki ana iwake ?” Saridin jawab “ yen Gusti Allah ngersake,nggih wonten sunan.” Klapa kuwi mau banjur dipecah, lan kabukti yen ing jero klapa mau ana iwake. Ngerti yen Saridin kuwi duwe kahebatan kaya ngono mau, banjur Sunan Kudus paring dhawuh supaya saridin ora maneh ngedaki lemah Kudus, supaya kahebatane kuwi mau ora dadi syirik wong liya. Ananging Saridin ora gelem lunga saka kudus, dheweke malah manggon ana ing sapiteng yaiku ing ngisor WC, nalika ana wong wedok lagi ana ing WC dheweke kaget ana Saridin ing kana. Banjur dheweke jerit – jerit, Sunan Kudus krungu bab kuwi banjur ngutus Saridin supaya lunga saka Kudus. Banjur dheweke lunga saka Kudus, lan tumuju ing Demak.

Ana ing Demak, Saridin ketemu karo gurune yaiku Sunan Kalijaga. Dheweke diutus supaya tapa ing laut, nalika Saridin tapa dheweke mung digawani klapa loro kanggo pelampung. Dheweke ora kena mangan, lan ora kena mangan yen ora saka banyu sing tiba saka dhuwur. Sakbubare tapa dheweke banjur dadi Syeh Jangkung ana ing Pati.

Contoh sambutan menggunakan bahasa jawa

Assalamualaikum wr wb
para sesepuh pinisepuh ingkang dahat kinabekten,
Bapak Prawoto minangka kepala dusun selarejo ingkang kinurmatan,
Tamu undangan ingkang boten saged kula sebataken setunggal - setunggal ingkang kula kurmati.

Sumangga langkung rumiyin kita ngaturaken puji syukur dhumateng ngarsanipun Gusti ingkang Maha Agung, ingkang sampun paring rahmat saha hidayahipun saengga kita sedaya saged kempal wonteng ing adicara pengetan dinten kamardikan kanthi bagas, waras boten wonten kirang setunggal menapa.
Shalawat saha salam mugiya tansahn kita aturaken dhumateng junjungan nabi agung, Nabi Muhammad SAW, ingkanmg tansah kita tengga syafaat wonten ing yaumul akhir.

Bapak, ibu, para rawuh ingkang kula kurmati. kula minangka sesulihipun para kadang panitia ngaturaken agunging panuwun dhumateng :
  Bapak Prawoto minangka kepala dusun Selarejo saha perangkatipun, ingkang sampun kersa rawuh wonten ing adicara pengetan dinten kamardikan samenika.
  Bapak Ikhsan minangka ketua RT ingkang sampun paring pangestu saha panyengkuyung wonten ing adicara samenika.
  Warga kakung putri, ingkang sampun paring pambiyantu awujud menapa kemawon.
mugiya sedaya kesaenan panjenengan pikantuk piwales dening Gusti ingkang Maha Agung.

Bapak, ibu, para rawuh ingkang kula kurmati.Kula nyuwun agunging pangapunten dhumateng panjenengan sedaya menawi wonteng ing adicara samangke kathah lepat saha kirang mrenani ing manah panjenengan sedaya. Kula minangka sesulihipun para kadang panitia tansah nyuwun supados panjenengan sedaya kersa lenggahan sinambi mirsani lampahipun adicara saking purwa madya dumugi wasana.

Wasana, cekap semanten atur kula. Menawi kathah lepating atur ugi kirang subasita kula nyuwun agunging pangapunten.

Wassalamualaikum wr wb

Ora Salawase

Sumilir angin 

Kang anggawe ayem atiku

Nadyan ta atiku krasa karanta – ranta 

Nanging ora kanggo dina iki 

Sing tak rasa amung ayem, tentrem 

Apa kang anggawe aboting atiku 

Kaya ta kabur kagawa angin 

Aku kepengin… 

Apa kang dak rasakna awan iki 

Salawase bisa tak rasakna 

Namung, 

Kuwi ora bakal kalakon kanggoku 

Amarga manungsa kuwi 

Pancen kudu ngrasakna susah lan uga seneng 

Supaya manungsa gelem ngupaya

dening : Novi A

Crita Kuna

Crita Kuna

Kumercik banyu

Kang kaprungu

Anggawe ayeme atiku

sanajan nandhang laraning atiku

marga lungamu

saben dina ngenteni tekamu

mung kuciwa olehku

kumercik banyu iki

kadya komedi

kang bisa nglipur ati iki

nalika slirahmu lunga mbuh nyang ngendi

apa ta pantes

yen ati iki tansah ngenes

uga eluh tansah tumetes

ngenteni slirahmu kang wus ora pantes

upama ta slirahmu lan awak iki

wus ora pantes sandhing

aku bakal lila

yen pancen slirahmu kudu lunga

pancen takdir kang wus tumata

yen ta awakmu lan awakku mung ana

ing crita kuna

Dening : Novi A